- Creación dun clima positivo de aprendizaxe na aula. Debemos poner en valor de xeito explícito os comportamentos que sonadecuados, (traballar na clase/casa, falar con amabilidade, mostrar tranquilidade na aula,… ).
- Non se debe prestar atención ao comportamento inadecuado, sempre que este non sexa demasiado perturbador ou perigoso para a integridade física do escolar e do resto de persoas.
- Ante un desafío ou negativa con certo grao de agresividade, débese garantir a seguridade do alumno ou a alumna, á vez que mostrar tranquilidade e firmeza, non responder ante a conduta desafiante e esperar a que diminúa ou remita, evitando alzarlle a voz e manifestándolle que se lle prestará atención cando se mostre sereno e tranquilo ou cando realice de forma adecuada o solicitado polo docente.
- No caso de condutas desafiantes, agresións, pelexas etc., poderase utilizar a estratexia do «tempo fóra», sempre baixo a vixilancia dun docente.
- Cando o profesorado trate de modificar un comportamento inadecuado convén que se refira ás condutas inadecuadas e non ao escolar. Evitar os termos absolutos e cualificadores cara ao alumno ou alumna e, no seu lugar, utilizar frases nas que se dea unha oportunidade á conduta adecuada.
Resultan útiles as seguintes suxestións:
- Centrarse nas condutas, non en características persoais.
- Dirixirse ao alumnado polo seu nome.
- Non usar xestos, palabras ou ton de voz despectivo.
- Mirar ao alumno ou alumna, usar xestos adecuados, aproximarse a el/a.
- Informar de cal é a conduta esperada.
- Apercibir en privado (ou en voz baixa, cunha mirada, preto do alumno ou alumna) e encomiar as condutas adecuadas.
- Prestar atención a condutas positivas alternativas.
- Prestar atención ao alumnado cando está a traballar, facilitar axuda cando a necesite, e chegar a acordos de traballo e/o conduta con eles e elas
- Usar algunha cualidade positiva do alumno ou alumna como referencia común na aula.
- Informar das consecuencias que se derivan se a conduta negativa persiste. Ser firmes e consistentes na aplicación das medidas disciplinarias, informar a este alumnado e ter a seguridade de que entendeu as consecuencias do seu comportamento.
- Falar ben do alumno ou a alumna en presenza doutros adultos ou compañeiros.
- Saudar e mostrar recoñecemento cando nos atopemos ao alumno ou alumna fóra da aula.
- É moi pouco recomendable entrar en confrontación directa co alumno ou a alumna. En ocasións, a súa intención é facernos perder o control e despistarnos da tarefa que pretendiamos que fixese. Se esta situación, aparece é mellor contar un tempo-fóra tanto para o profesorado como para o alumnado. É mellor recuperar o control e non deixar ver cales son as nosas debilidades (nerviosismo, perdas de control, ameazas) na interacción cos menores. De ningún xeito, isto supón que debamos deixarlle facer a súa vontade, máis aínda, a nosa proposta é a de crear un ambiente altamente estruturado onde este alumnado saiba que debe facer en cada situación. Ante pautas consistentes de educación, este adoita reducir os intentos de xerar enfrontamento.
